Raúl Gutierrez, «Rulo» ezizenaz ezagunagoa, Reinosako (Kantabriako) kantautore ospetsua da, eta Rulo y la Contrabanda rock-taldea sortu zuen 2010ean. Rulo y la Contrabanda taldeak bederatzi album eta hainbat single argitaratu ditu guztira eta, zalantzarik gabe, bere aztarna utzi du Espainiako rockaren historian. Aurten, antzokietako bira berezia eta bere taldearekin herrialdeko jaialdirik garrantzitsuenetan formatu elektronikoan egiten ari den kontzertuak uztartzen ari da. Hala, CaixaBank Miramar Gauak jaialdian ere egongo da, eta zuzeneko biziaz eta abestirik ezagunenez gozatzeko aukera paregabea izango dugu.

Valeria Castrok hotzikarak sortzen dituen ahots samur eta hauskorra du. Abesten eta kontatzen duen guztia ulertzeko, haren aurretiko ibilbidea hartu behar da aintzat: haren lurra, haren familia, haren herrikideak, haren jaioterri den La Palma uhartearen aztarna ezabaezina. Valeria Castro, 25 urte soilik izanik, mundu gaztelaniaduneko etorkizun handieneko ahotsetako bat da, eta dagoeneko hainbat sari lortu ditu, baita, besteak beste, Latin Grammy sarietarako bi izendapen eta Goya sarietarako bat ere.

La Palmako abeslari ospetsua Miramar jauregian izango da Europan, Estatu Batuetan eta Latinoamerikan zehar egiten ari den «El cuerpo después de todo» biraren barruan.

2025ean 30 urte beteko dira Garik bere bakarkako ibilbidea hasi zuenetik. Hertzainak taldean egon ondoren, alderdi intimo eta pertsonalago batean sakondu zuen bere lehen abestietan Garik. Lehen diskoa benetako artelana da, baina, agian garaiko gehiegikeriengatik, ezin izan zuen zuzenean merezi zuen moduan aritu. Zenbait urte gorabeheratsuren ondoren, aro egonkor bat bizi du orain, eta bere musikan eta kontzertuen indarrean islatzen da hori. «Gari. 30 urte» biran, Euskal Herriko abeslari nagusi ospetsuenetako bat izanik, bere abesti ezagunenetako batzuk ekarri ditu, eta errepertorio horretaz inoiz ez bezala gozatzeko aukera emango duen ikuskizun berezi bat eskaintzen du, Maldanbera banda paregabearekin batera.

Las Migas taldea nazioartean ospe handiena duen espainiar taldeetako bat da; hain zuzen, 50 herrialdetan baino gehiagotan eman ditu kontzertuak. Hogei urte darama musikaren munduan, eta sei estudioko disko kaleratu ditu. Duela bi urte Latin Grammy bat lortu zuen Musika Flamenkoko Disko Onenaren kategorian. 2024an, Las Migasek Rumberas diskoa aurkeztu zuen eta, berriz ere, Latin Grammy sarietarako izendatu zuten. Disko horretan, estiloak eta mugak gainditzen dituen nazioarteko musika-genero hori aldarrikatzen dute (kubatarra, flamenkoa eta katalana ere izan daiteke). 2025eko udaberrian, Las Migas taldeak Flamencas albuma estreinatuko du. Lan horretan, purutasunaren alde egin du, Reinas del Matute lehen diskotik hurbilago dagoen sonoritate batekin. Lankidetza apartak izan ditu; besteak beste, hauekin: Estrella Morente, Sílvia Pérez Cruz, Viva Suecia, Rozalén, El Kanka, Kevin Johansen, Tomatito, Miguel Poveda, María Peláe, Raül Refree, Josemi Carmona eta Loli Molina.

Mikel Izalek El miedo y el paraíso argitaratu zuenean hasi zuen bere bakarkako ibilbidea. Hamar abestiz osatutako lan diskografiko horri esker, nork bere burua ezagutzeko bidaia batean murgilduko gara musikagileak azken urteotan izan dituen emozio eta gogo-aldarteetan barrena.

Albuma kaleratu zuenean, Mexikon hasi eta gure herrialdeetako antzoki eta auditoriumetara zabaldu zen bira bat hasi zuen. Hiri batzuetan 24 ordu eskasean agortu ziren sarrerak; Donostian, esaterako. Datorren maiatzaren 30ean, Mikel Izal berriz izango da gure hirian show berritu eta desberdin batekin, oraingoan barruti handietara egokitua, El miedo lanetik hasi eta El paraíso laneraino doan bidaia emozional batean. Topaketa ahaztezina eta paregabea izango da publikoarentzat, eta indar bereziz distiratuko dute haren azken laneko abestiek, zeinak milioika entzule konkistatu baitituzte dagoeneko; halaber, bere ibilbide osoan IZAL taldearekin sortu dituen beste hainbat arrakasta abestuko ditu.

Musikarien alaba izanik, Rita Payés Sant Andreu Jazz Band taldean sortutako talentuetako bat da; jazzaren munduan etorkizun handiena duten musikari gazteetako batzuk handik atera dira, hain zuzen. Donostian De camino al camino aurkeztuko du, bere hirugarren albuma, zeinetan eguneroko gauzen edertasuna bilatzen baitu. Gure jatorriarekin lotzen eta aurrera egitera bultzatzen gaituzten sustraien lekukotza bat, askotariko estilo eta eraginen bilduma bat, hari gidari bakar bat ardatz harturik: bide bat. Bidaia musikal honetan, emozioa, maisutasuna eta sustraiekiko lotura bikain elkartzen dira.

Leo Rizzi Eivissa uharte liluragarrian jaio zen eta Uruguaiko lurralde oparoetan hazi zen; gaur egun, indie poparen erreferenteetako bat da. Oso gaztetatik, sormena eta originaltasuna izan ditu bereizgarri, eta publikoa liluratu du, bere irudi bereizgarriarekin eta bere presentzia magnetikoarekin. Mediterraneoko sustraiak eta Hego Amerikan hazi izana bere artean islatzen dira, eta energia paregabea eta naturarekiko eta hiriko bizitzarekiko lotura helarazten ditu. Pájaro Azul izeneko bere azken albumarekin, Leok nortasun artistiko berezi bat finkatu du eta, horrekin, Estatuko eta nazioarteko arreta piztu du, bere ahots paregabeari eta sormenezko energiari esker. Album honek artistaren indarrik handiena islatzen du; izan ere, lan benetan dotore eta modernoa da, non musika eta arte bisuala maisuki elkartzen baitira.

Rizzik Kontxa Agertokiari soinu-banda jarriko dio maiatzaren 30ean, 2000ko hamarkadako pop-rock latinoaren eta anglo-saxoiaren eragina duen bere doinu alternatiboarekin.

2001ean Jon Maya Sein dantzariak sortua, Kukai Dantza Errenterian jaio eta bizi den konpainia da. Tradiziotik abiatutako sorkuntza garaikidea ikur duela, elkarlanean oinarritutako lengoai propio bat landu du urte hauetan, eta horren fruitu dira ondutako kolaborazio eta ikuskizun arrakastatsu andana: Lengoaia artistiko anitzekin elkarrizketak sustatu ditu (antzerkia, zinema, arte plastikoak, gastronomia…) eta nabarmentzekoa da Kukai Dantzak espazio eta ekimen berezietan lan egiteko adierazten duen gaitasuna: museoak, arkitektura bereziko guneak, naturguneak…

Hainbat sari jaso ditu bere ibilbidean zehar, eta datorren maiatzaren 30ean Miramarrera iritsiko da, Jauregiko lorategiak zeharkatuko dituen ikuskizun berezi eta ahaztezinarekin.

Alex del Toro donostiar DJ eta ekoizle kutuna arduratuko da, beste urte batez, ostiralari amaiera ikusgarri bat emateaz. Haren energia bizia eta publikoarekin konektatzeko duen talentu ukaezina izango dira saioaren protagonista, publikoa etenik gabe dantzan jarriko duten abestien errepertorio batekin. Berezko dituen dotoreziaz eta alaitasunaz, askotariko estiloak uztartuko ditu, gaua esperientzia ahaztezin bihurtzeko.

Hasiera bat lana Gorka Urbizuk bere izenaz sinatzen duen lehen diskoa da. Hogeita bost urtez Berri Txarrak taldearen buru izan ondoren, nafar musikariak edertasunaren eta gordintasunaren aldeko apustua egin du, eta abestiaren bihotzera doan bidaia bat proposatzen digu. Hainbat soinu geruza erabiltzearen tentaziotatik ihesi, egileak kontrako bidea aukeratu du: album osoan, dirudienez, abestiak biluztu eta hustu nahi izan ditu, soil-soil utzi arte. Ederrak. Gordinak.

Puruak. Halakoxeak dira: harriak bezain gogorrak, haizeak daramatzan hostoak bezain hauskorrak. Hainbat urtez eszenatokietatik urrun egon ondoren, album honekin itzuli da Urbizu, eta sekulako harrera izan du. Benetako luxua da halako artista bat, bere banda eta azken urtean publikoak eta kritikak gehien txalotu duten albumetako bat zuzenean entzuteko aukera izatea.

Siloé Espainiako musika-eszenaren proposamenik originaletako bat da, zalantzarik gabe. Fito Robles kantari eta kantautoreak, Xavi Road gitarrista eta ekoizleak eta Jaco Betanzos bateriak osatutako Valladolideko hirukote honek eboluzionatu egin du eta folk egile-abestia eta pop rocka musika elektroniko dantzagarrienarekin nahastu ditu.

La verdad (2016), La luz (2018), Metrópolis (2020) eta Paradiso (2021) diskoak argitaratu ondoren, lehengo urteko azaroan birarik anbiziotsuenari eman zioten hasiera. Hiru Riviera jarraian egin zituzten, eta 35 sold out baino gehiago lortu zituzten. Etapa berri honetan, beraien bizitzako diskoa dena aurkezten ari dira: Santa Trinidad. Albuma aho batez abesteko sortutako bat-bateko himnoz dago beteta; halakoak dira, esaterako, Todos los besos, Sangre en las venas eta Esa estrella abestiak, eta oso argi uzten dute Siloé Estatuko pop rockaren panoramako talderik garrantzitsuenetako bat dela.

Hemezortzi urte soilik zituela, 2021ean, Margaritas y Lavanda bere lehen diskoa aurkeztu ondoren, eta herrialdeko eszenatokirik garrantzitsuenetan zehar ibilita, gaur egun Qué lástima biran dago sartuta bete-betean. Artistaren azken diskoaren izena du birak; hain zuzen, zuzenean jotzeko pentsatua dago, eta rockaren eraginak eta gaur egungo soinuak uztartzen ditu. Artistaren ibilbidea markatu dute haren gaztetasunak eta berezitasunak, baina nolabaiteko bilakaera izan du eszenatokietan, eta horren guztiaren emaitza da album berria. Hiru urtez bira egiten ibiltzeak bigarren disko ausart eta pertsonal hau aurkezteko behar zituen ikuspegia eta energia eman dizkio eta, orain, iraganaren eta gaurkotasunaren arteko oreka bilatu nahi du, zerbait berria sortuz.

Valérie Ekoumé frantziar-kamerundar abeslari bat da eta musika-kulturen eta -tradizioen nahasketa aberats bat taularatzen du. Haren ibilbideak norabide-aldaketa nabarmena izan zuen 2004an, Manu Dibango ospetsuarekin eta haren Soul Makossa Gang taldearekin elkartu zenean. Zortzi urtez, musika-ikono horrekin bira egiteko aukera izan zuen, eta esperientzia horrek nabarmen markatu zuen artistaren ibilbidea, baita haren talentua nazioarteko eszenatokian finkatu ere.

2005ean, prestakuntza musikala hobetzea erabaki zuen eta Parisko American School of Modern Music eskolan eman zuen izena. Hainbat musikari ospetsurekin egin du lan, Alain Barrière eta Papa Wemba artistekin, besteak beste, eta belaunaldi kulturaniztunaren artisten artean finkatu da, mugak eta generoak zeharkatzen dituzten eraginak izanik. Ekoumé ezaguna da bere afrikar sustraiak eta estilo garaikideak uztartzen dituelako; hala, bere herentzia eta mundurako begirada irekia agerian jartzen dituen proposamen musikal paregabe eta liluragarri bat sortzen du.

LaMia Mari Oihana da, Donostian bizi den eta underground eszenaren lehen lerroan kokatzea lortu duen dj-a. Bere set dinamikoek bpm-s eta generoen aldaketa-joko bat aurkezten dute, non marjinekin jolasteko zaletasuna erakusten duen, mugak eta generoak gainditzen dituen esperientzia musikal bat sortuz, dantza eta mugimendua lehenetsiz. Erritmo lehergarri eta biziek amaiera emango diete hiru jaialdiei, "klubeko musikaren" marjina erakargarrienetan barrena ibiliz.